FSKTL la partisipa eventu internasional, Abrao : Presiza normaliza komunikasaun

Dili - Tinan Barak ona Federsaun Shorinji Kempo Timor Leste (FSKTL), la partisipa iha eventu internasional, Sekretáriu Estadu Joventude no Desportu (SEJD), Eng. Abrao Saldana hatete, sira presiza normaliza sira-nia komunikasaun ho Federsaun Internasionál.

Iha tinan 2011 too 2013 Federsaun Shorinji Kempo nu’udár modalidade importante, tan Timor Leste rasik mak propoin liuhosi reuniaun komité olimpiku nian, no governu liu husi SEJD hakerek surat ba nia membru Governu molok nasaun atu realiza eventu ne'e hodi sira bele tetu.

"Maibé governasaun tuir mai ho mós ita-nia olimpiku lobi mak ladún di'ak karik ita lahatene tanba ne'e maka altura iha Singapure ho Filipina ita la konsege partisipa " dehan Miguel Manitelu iha salaun Universidade da Paz UNPAZ Surikmas Dili segunda (07/12/2021).

Miguel hatete, “tinan oin iha Vietnam iha fulan Maiu Shorinji Kempo sei haruka karta ida ba Governu, ba SEJD no mós komité olimpiku Timor Leste para sira bele lobi, tanba la'ós Kempo mak lobi direitamente tenke liuhosi ita-nia governu no mós komité olimpiku Timor Leste para ita bele tama ba jogu ne'e.

Nia esplika, “Modalidade desportiva ida atu tama ba Sea Games, pelu menus iha nasaun 7 ou 8 mak tenke fo apoiu no Ikus liu Federsaun Shorinji Kempo partisipa iha 2013 iha Myanmar”.

Hatan ba Kestaun ne'e Sekretaria Estadu Joventude no Desportu (SEJD), Eng. Abrao Saldana esklarese, “Ida ne'e presiza normaliza fali sira-nia komunikasaun ho Federsaun internasionál, Shorinji Kempo ne'e seidauk tama ba komite olimpiku maibé modalidade Asean Games, Asian para Games, pois ita haree hamutuk ho CDTL ho CONTL mak bele haree oinsá mak sira bele ba ou lae”.

“Husi governu apoiu nafatin Shorinji Kempo ninia kampeonatu ne'e governu mak apoiu mak sira realiza sira-nia kampeonatu”. Nia subliña.

Enteretantu Federsaun Shorinji Kempo Timor Leste (FSKTL), sai Federsaun dahuluk ne'ebé mak lori Timor Leste nia naran hodi hetan medalla osan mean iha Sea Games iha tinan 2011 iha GOR Ciracas Jakarta Timur Indonézia.

Rep.: CharllY