SEJD ensera ona kampeonatu nasionál FSKTL

Dili - Kuarta (08/12) Sekretáriu Estadu Juventude no Desportu (SEJD) ensera ona Kampeonatu Nasionál Federsaun Shorinji Kempo Timor Leste (FSKTL), ba dala VIII ne'ebé mak hala'o durante loron tolu, hahú husi loron 06 to'o loron 08 Dezembru 2021.

Maria Luiza Monteiro, Diretora Nasionál Alta Kompetisaun reprezenta SEJD ensera atividade kampeonatu nasionál FSKTL ba dala VIII ne'e hatete, Federsaun Kempo nia kampeonatu ba dala VIII ne'e governu fo apoiu tanba la'ós ba Modalidade Kempo de'it maibé ba Modalidade hotu hotu ne'ebé mak hamahan aan iha Federsaun sira governu apoiu.

Nia arugumenta, kampeonatu ida ne'e bele sai hanesan rekezitus ida ba atleta sira tanba atleta sira presiza treinu maibé mós iha kampeonatu sira hanesan ne'e para sai sausukat ba sira.

"Ha'u hanoin katak parte governu apoiu nafatin ba Federasaun sira husu ba Federasaun sira tenke servisu hamutuk ho strutura sira atu nune'e bele dezenvolve talentu ita nia atleta sira" dehan nia.

Nia akresenta, governu nafatin fo apoiu ba Federasaun sira hotu ne'ebé mak iha CDTL nia okos husi governu nafatin apoiu.

Iha fatin hanesan Prezidente Komisaun organizadora Serviano Cardoso, informa Kampeonatu ida ne'e bele realiza tanba hetan apoiu finanseiru husi SEJD,

"hanesan parseiru ba SEJD ami, tinan tinan Ami sempre hetan apoiu husi SEJD, atividade kampeonatu nasionál Shorinji Kempo ba dala VIII. Ne'e hanesan planu ne'ebé mak ami hatuur ona iha ami nia statutu Federsaun nian" Dehan nia.

nia akresenta, ne'e hanesan atividade regular entaun sira kontinua nafatin atividade planu regular ne'e iha tinan oin no sei kontinua tan implementa kampeonatu kompetisaun nasionál ba dala lX

"Ami nafatin iha esperansa bele hetan apoiu husi governu liu liu Sekretariu Estadu Juventude Desportu (SEJD)," katak nia.

Enkuantu ba kampeonatu ne'e hetan partisipasaun masimu husi Munisípiu lima hanesan Ermera, Maliana, Baucau, Dili no Lautém.

Totál atleta hamutuk 100 kompostu husi mane 61 no feto 39 no iha klase hamutuk 16 ne'ebé mak kategoria jogu junior no mós jogu senior.

Premiu ba manan nain primeiru lugar mak tasa ida inklui osan montante 150 dólar Amerikanu.

Segundu lugar mós tasa ho osan $ 100, terseiru lugar $ 75 dólar Amerikanu inklui tasa ida.

Enteretantu ba atividade kampeonatu nasionál Shorinji Kempo Timor Leste ba dala VIII ne'e hetan apoiu fundus husi SEJD ho montante dólar 21.135 dólar Amerikanu.