Alexandre Morreira Lori Emmanuel FC Sai Kampiaun

Dili-Jogadór Emmanuel FC Alexandre Morreira lori ninia klube sai kampiaun divizaun daruak Liga Futebol Timor-Leste (LFTL) epóka 2021 iha jogu final kontra Academica FC ho marka golu rua.

“Ha’u sente kontente los tanba marka golu rua hodi lori Emmanuel FC sai kampiaun iha tinan ida ne’e tanba joga nafatin tuir orientasaun husi treinadór”, jogador Emmanuel FC Alexandre Morreira ba Jornalista JHD iha Stadium Munisipál Dili, tersa (7/12).

Nia dehan, “iha jogu nia laran uluk nanain hakarak hetan rezultadu di’ak ne’ebe agradese ba maromak ne’ebe haraik grasa hodi hetan rezultadu diak tanba nafatin rona tuir orientasaun treinador no sente kontente los lori klube sai kampiaun iha tinan ida ne’e no jogu tuir mai sei nafatin esforsu hatudu joga di’ak”.

Observasaun jornalista, jogadór Alexandre Morreira númeru kamizola 9 sai hanesan avasadu klube Emmanuel FC nian ohin hatudu joga di’ak tebes ho joga ekipa iha jogu final divizaun segundu hasoru nia adversariu ne’ebé marka golu rua husi asistensia jogadór Filomeno Savio iha minutu 11 no 45 fó vitoria ba nia ekipa sai kampiun divizaun segundu LFTL epóka 2021.

Jogadór sira husi Emmanuel FC liliu Alexadre Morreira hatudu jogu di’ak tebes iha jogu final ne’ebé sira nia jogu anima tebes ninia adeptu sira no adeptu adversariu nian no sira servisu makaas iha jogu minutu sianulu nia laran tanba sira nia adversariu mós klube ida ne’e forsa tebes manan klube barak tiha ona hafoin tama final hasoru sira.

Rep.: Augustu