Derota kontra Aitana Fc, Francisco konsidera falla iha tekniku individual

Dili - Treinador As Ponta Leste Francisco Araújo fo kulpa ba nia jogador hafoin derota kontra Aitana Fc ho score mihis 2-1 iha jogu kontinuasaun Liga Futebool Timor-Leste (LFTL) Primeira divizaun epoka 2021.

Iha jogu ne'e As Ponta Leste ne'e mak hatudu ritmu jogu ho di'ak desde inisiu konsege lidera uluk ho score 1-0 iha minutu 22. Maibé liu de'it minutu 6 Aitana responde hikas liu husi Avansadu Francyatma Ima Kefy hodi halo empata score ba 1-1.

Dala ida tan Francyatma Ima Kefy sai mehi aat ba AS Ponta Leste hafoin Kefy marka tan golu ida iha segunda parte hodi fo vitória ba nia ekipa Aitana Fc ho score 2-1.

Hafoin remata jogu treinador As Ponta Leste Francisco Araújo hatete, jogu ohin la'ós failansu husi estratéjia maibé failansu husi tekniku individual.

"Ha'u sente jogu ohin la'ós failansu iha estratéjia maibé failansu iha tekniku individual ida-idak" deklara Francisco Araújo ba jornalista sira iha stadion Munisipal Dili sabadu (11/12/2021).

Treinador kometa, iha Primeira parte oportunidade barak hodi marka golu maibé avansadu la aproveita oportunidade ho di'ak nune'e rezultadu fo oportunidade ba ekipa adversariu hodi marka golu.

"Golu ida Primeiru failansu entre defeza no guarda rede no golu segundu falla iha konsentrasaun wainhira adversariu halo kontra atake" tenik Francisco.

Iha fatin hanesan treinador Aitana Fc Octavio da Costa Alves hatete, antes nia promete ona katak sira sei rekolla pontus 3.

"Hanesan iha konferensia pers liu ba ha'u promete ona katak ami tenke rekolla pontus 3 ne'e mak jogu ohin hanesan final ba ami" tenik Octavio.

Nia dehan, jogu tuir mai sei hadia tan jogador sira nia fiziku tanba sistema jogu jogador sira komprende di'ak tebes.

Rep.: CharllY