Fahe pontus ho AD. SLB, As Ponta Leste Mantein iha klasifikasaun daruak

Dili - As Ponta Leste fahe pontus ho nia ekipa adversariu AD SLB Laulara hafoin empata ho score okulista 0-0, iha jogu kontinuasaun Liga Futebool Timorense Primeira Divizaun jornada 4 epoka 2021.

Duelo entre jigante rua ne'e hala'o iha Estadion Munisipal Dili Domingu (05/12/2021), iha inisiu jogu ekipa rua hotu hotu hatudu jogu ne'ebé furak hodi atrai adeptus hadomi bola sira, liu husi kontra atake no tatika husi ain ba ain.

Iha jogu Primeira parte, ne'e ekipa rua tenta lansa kontra ataka ba malu hodi marka golu maibé guarda defensivu husi kada ekipa hotu-hotu solidu ho nune'e la iha golu ruma mak akontese.

Tama ba iha minutu 43 ekipa Makikit Laulara tenta atu halo mudansa ba jogu liu husi subtituisaun ba jogador hodi dada sai jogador, Cornelius Portela no hatama Job Mark Freitas maibé mudansa ne'ebé mak Ekipa Makikit Laulara halo seidauk hetan rezultadu pozetivu ho nune'e to'o termina jogu primeira parte score mantein 0-0.

Kontinua ba jogu segunda parte ekipa rua ne'e hahú jogu ho intensidade aas hodi halo kontra atake ba malu, no tama ba iha minutu 65 Silveiro Garcia simu bola kruza husi parte loos hodi kabesa maibé sei bele antisipa husi guarda rede nune'e la rezulta golu.

As Ponta Leste kontinua halo ameasa ba rede SLB iha minutu 68 liu husi jogador Marito dos Santos maibé seidauk kona tarjetu.

SLB hahú kore aan sai husi presaun Ponta Leste ho núne'e tama ba iha minutu 70 konsge suta ameasa dala ida liu husi jogador Aldo Amaral maibé sei bele salva husi baliza nune'e la rezulta golu.

Tama ba iha minutu 72 As Ponta Leste remata fila fali liu husi jogador Silveiro Garcia maibé nafatin salva husi baliza.

SLB fo suta ameasa dala ida tan liu husi jogador Luis da Silva iha minutu 85 salva husi guarda rede

Maske ekipa rua mantein lansa kontra no ataka ba malu maibé la iha golu ruma mak akontese to'o termina jogu segunda parte score mantein 0-0.

Husi rezultadu empata hatuur nafatin ekipa Ponta Leste iha pozisaun da Ruak ho pontus 7 husi joga dala 3 manán dala rua no empata dala ida .

Enkuantu AD SLB Laulara sa'e ba okupa iha terseiru klasifikasaun provizoriu Liga Timorense Primeira Divizaun ho pontus 6 husi joga dala 4 manán dala ida no empata dala tolu.

---

AD SLB Laulara : Filonito Nogueira, Nidio Alves, Cornelis Portela, Filipe Oliveira, Tonito Belo, Natalino da Costa, Alexandre Ima Kefy, Fernando de Carvalho, Jorge moniz, Aldo Amaral, Jerimias Baptista.

AS Ponta Leste : Albino Ximenes, Candido de Oliveira, José de Oliveira, Americo Martins, Expedito da conceicao, Ejiviano da Costa, Silveiro Garcia, Mumin Mohammed, Revelino Martins, Ricardo Bianco, Izaac Dos Santos.

---

Rep.: CharllY