Golu rua husi Kefy hado'ok Aitana Fc husi zona mean
- jhdmediatl
- Dec 11, 2021
- 2 min read
Dili - Francyatma Ima Kefy susesu marka golu 2 hodi lori nia ekipa Aitana Fc konkista vitória da-huluk iha jogu kontinuasaun Liga Futebool Timor Leste (LFTL) primeira divizaun semana 5 epoka 2021.
Jogu ne'ebé mak hala'o iha Estadion Munisipal Dili sabadu (11/12/2021), iha inisiu jogu ekipa rua hotu hotu hatudu jogu furak iha kampu hodi atrai adeptus Futebolovers sira.
Ekipa As Ponta Leste ne'ebé mak hatudu ritmu joga desde kick off nafatin halo presaun ba Aitana Fc liu husi tatika husi ain ba ain no tama ba iha minutu 20 rede Aitana Fc nakdoko hafoin Silveiro Garcia fura rede Aitana Fc ne'ebé hein husi Yusak Redjauw, maibé golu refere kansela tiha husi arbitu tanba, Silveiro Garcia marka golu iha pozisaun offside.
As Ponta Leste foin lidera ho score 1-0 iha minutu 22 liu husi jogador Marito dos Santos , extremu iskerda ho númeru kamizola 9 ne'e marka golu hafoin hetan bola baruilu iha area perigozu Aitana nian.
Lidera ona ho score 1-0 ekipa As Ponta Leste la para ho ida ne'e maibé mantein lansa kontra no ataka ho nune'e tama ba iha minutu 24 As Ponta Leste hlo tan ameasa ba rede Aitana maibé oportunidade ne'e la aproveita ho di'ak husi Garcia ho núne'e la rezulta golu.
Aitana Fc foin marka golu responde iha minutu 28 liu husi jogador Francyatma Ima Kefy ho núne'e halo empata score ba 1-1, futebolista ho númeru kamizola 21 ne'e marka golu liu husi suta livre ho distansia dook.
Ekipa rua mantein nafatin kontra ataka ba malu maibé la iha tan golu ruma akontese to'o termina jogu primeira parte score mantein 1-1.
Kontinua ba jogu segunda parte ekipa rua ne'e tun kedas ho intensidade jogu ne'ebé mak aas ho halo kontra no ataka ba malu no tama ba iha minutu minutu 59 Francyatma Kefy fura rede Ponta Leste dala ida tan hodi lidera hikas ho score ba 2-1.
Sofre ona golu halo ekipa As Ponta Leste halo atake makas liu tan hodi halo empata ba jogu maibé la iha tan golu ruma mak akontese to'o termina jogu segunda parte vitória ba Aitana Fc ho score 2-1.
Husi rezultadu vitória ne'e lori la mudansa pozisaun Aitana Fc no mantein okupa iha pozisaun 6 ho pontus (4) husi joga dala haat (4) manán dala ida (1) empata dala ida (1) no derota dala rua (2), Liu pontu 3 husi DIT Fc pozisaun 7 ho pontu 0.
Enkuantu As Ponta Leste mantein okupa iha terseiru klasifikasaun provizoriu LTFF ho pontus 7 no pontus hanesan ho AD SLB ne'ebé mak okupa iha Segundu klasifikasaun maibé diferente golu.
Aitana Fc : Yusak Redjauw, josehp Koami, Francelino Belo, Lamberto Ximenes, Rigelberd Lay, Angelo Fernandes, Alexandre Nogueira, Miguel Araújo, Edit Savio, Francyatma Ima Kefy, José Pereira.
As Ponta Leste : Francisco Gusmao, Nelson António, Candido de Oliveira, José de Oliveira, Americo Martins, Expedito da Conceicao, Jacinto Soares, Amancio Soares Marito dos Santos, Silveiro Garcia Domingos de Araújo.
Rep.: CharllY
Comentários