Lalenok United Fc Prontu Prolonga Oportunidade Karketu Dili Fc Sai Kampiaun

DILI- Lalenok United FC prontu prolonga oportunidade Karketu Dili FC sai kampiun iha Jornada da-4 divizaun dahuluk Liga Futebol Timor-Leste epoka 2021 iha loron domingu (12/12) iha Stadium Munisipal Dili hodi rekolla pontu tolu.

“Tuir informasaun hau rona Karketu Dili FC ba jogu bainrua nian hasoru Lalenok United FC, se sira manan ami sei halo selebrasaun tanba sira iha Oportunidade atu sai kampiun maibe fo atensaun katak jogu minitu 90 remata mak haree dalaruma ami sei Prolonga sira nia selebrasaun Ida ne’e”, Treinador Lalenok United FC ba JHD iha sala konferensia LFTL Bairro Formosa, Dili sesta (11/12).

Treinador hatutan, jogu aban hasoru Karketu Dili FC ho tarjetu tenki manan sira hodi rekolla pontu tolu tanba jogu ida ne’e importante tebes ba sira hanesan final, se impata ka lakon Klube Lalenok United FC la iha ona oportunidade atu sai kampiaun ne’ebe sira sei esforsu masimu para bele rekolla pontu tolu husi adversariu ne’e.

"Jogador ladun kompletu tanba jogador prinsipal nain rua ne’ebe sei labele joga ida hetan akumulasaun kartu no ida iha problema fiziku maibe sira prepara jogador seluk hodi troka sira nia fatin no preparadu tiha ona bainrua hasoru Karketu Dili FC ne’ebe agora daudaun lidera tabela klasifikasaun liga nian", Gaspar hateten.

Treinador Lalenok dehan, estratejia jogu ba iha kampu mak sira sei haree hodi halo mudansa kontra Karketu Dili FC tanba sira hatene klube adversariu nia jogador lina avansadu no klaran diak tebes maibe sira sei responde ida ne’e iha jogu.

Rep.: ADS