Nidio Alves estraga Assalam Fc nia mehi Manan AD. S.L.B.
- jhdmediatl
- Dec 10, 2021
- 3 min read
Dili - Kapitaun AD SLB Nidio Alves susesu marka golu 2 hodi salva Makikit Laulara husi Derota kontra Assalam Fc ho score 3-3 iha jogu kontinuasaun Liga Futebool Timor-Leste (LFTL) Primeira divizaun jornada 5 epoka 2021.
Duelo entre Armada Verde kontra Makikit Laulara ne'e hala'o iha Estadion Munisipal Dili sexta (10/12/2021).
Iha inisiu jogu ekipa rua tun ho ambisaun aas hodi marka golu desde inisiu jogu maibé SLB Laulara ne'ebé hatudu ritmu jogu konsege domina bola, maibé Assalam Fc halo AD SLB Laulara hakfodak liu husi golu sedu Hasan Ramos Costa iha Minutu 6.
Avansadu ho númeru kamizola 7 ne'e marka golu liu husi suta livre hodi fura rede AD SLB ne'ebé hein husi Andrew Mensah ho nune'e score muda aan ba 1-0.
Hela ho score 1-0, halo ekipa AD SLB hahú halo presaun ba Assalam Fc no tama ba iha minutu 13 AD SLB susesu marka golu ida hodi hatuur score ba 1-1 liu husi kapitaun AD SLB Nidio Alves.
Ho score refere jogu entre ekipa rua ne'e manas liu tan no tama ba iha minutu 35 Jerimias Baptista konsege lori SLB lidera hikas ho score 2-1.
Extremu direta ho númeru kamizola 69 ne'e marka golu hafoin hetan bola barullu iha area perigozu Assalam nian.
Score 2-1 ne'e la dura ho tempu naruk hafoin jogador Hasan Ramos Costa marka tan nia naran iha minutu 37 hodi muda score ba 2-2.
Avansadu ho númeru kamizola 7 ne'e marka golu hafoin simu assistensia bola kruza husi nia kompañeru Husen Costa iha parte iskerda no Hasan Ramos susesu kabesda hodi fura rede AD SLB ne'ebé mak hein husi Andrew Mensah.
Ekipa rua ne'e mantein lansa kontra no ataka ba malu maibé la iha tan golu ruma mak akontese to'o apitu lian score mantein 2-2.
Kontinua ba jogu segunda parte ekipa rua ne'e mantein lansa kontra no ataka ba malu no tama ba iha minutu 49 rede AD SLB nakdoko hikas hafoin Hasan Ramos marka terseiru alias hatrick hodi lori nia ekipa Assalam Fc lídera ho score 3-2.
Hela ho score 3 - 2 SLB kontinua halo presaun ba Assalam Fc liu husi tatika husi ain ba ain maibé defeza husi Assalam Fc la fó fatin ba SLB hodi marka golu.
Golu empata foin akontese iha minutu 74 liu husi Kapitaun Nidio Alves mak susesu fura rede Assalam Fc ne'ebé mak hein husi guarda rede Wahyu Pratama hodi hatuur score ba 3-3.
Futebolista ho númeru kamizola 93 ne'e marka golu hafoin defeza husi Assalam Fc falla iha kontrola bola no Nidio Alves susesu hadau hodi fura rede Assalam.
Maske ekipa rua mantein lansa kontra no ataka ba malu maibé la iha golu ruma mak akontese to'o termina jogu segunda parte, score mantein empata 3-3 ho nune'e ekipa rua tenke fila ho pontus ida-ida.
Husi rezultadu empata nee la muda Assalam Fc nia pozisaun no mantein tuur iha 5 klasifikasaun provizoriu (LTFF) ho pontus 4 husi joga dala 4 derota dala rua (2) no manán dala ida (1) no empata dala ida (1).
Enkuantu AD SLB sa'e ba okupa iha Segundu (2) klasifikasaun ho pontus (7) husi joga dala 5 manán dala ida (1) no empata dala haat (4).
Assalam Fc : Wahyu Pratama, Almerito da Silva, Hasan Costa, Adao Doutel, Husen Costa, Helder Valente, Riki Permana, Martinho Belo, Bonarudin Amin, Augusto da Costa, Emmanuel Tunu.
AD SLB : Andrew Mensah, Nidio Alves, Tonito Belo, Natalino da Costa, Jordao da Silva, Alexandre Ima Kefy, Fernando de Carvalho, Pascoal Ximenes, Jorge Moniz, Aldo Amaral, Jerimias Baptista.
Rep.: CharllY
Commentaires