Tailandia tenki servisu maka’as molok manan Timor-Leste

Dili - Selesaun Nasionál Timor Leste konsege redus Tailandia nia agresivu iha primeiru enkontru ho score 2-0 iha jogu Abertura AFF SUZUKI CUP, grupu A tinan 2020.

Duel entre Timor Leste kontra Tailandia ne'e hala'o iha Singapure Nasionál Stadium, Domingu (05/12/2021). Iha inisiu jogu ekipa Lafaek no ekipa Tailandia ne'ebé koñesidu ho naran (Elefante Mutin) hatudu furak.

Ekipa Lafaek hahú jogu ho formasaun 4-2-3-1, hili atu la halo jogu nakloke hodi kontra ekipa Elefante mutin. Ho nune’e, fo opurtunidade barak ba adversariu atu bele kontrola jogu hodi lansa suta fila fila ba rede Lafaek ne'ebe mak hein husi Junildo Pereira.

Ho ball possession 20 – 80, halo ekipa elefante mutin konsege sulan ekipa lafaek durante primeira parte, hodi resulta suta hamutuk dala-12, no dala-3 mak kona tarjetu. Maibé, tan ekipa Lafaek nia disiplinasaun no koordenasaun entre jogadór halo Tailandia lansa suta barak husi liur, nune’e, obrigadu Tailandia termina primeira parte ho score 0-0.

Kontinua ba jogu segunda parte ekipa rua tun fila fali kampu. Selesaun Nasionál Timor Leste tenta loke jogu hodi lansa kontra atake. Tama ba minutu 51 ekipa lafaek tenke sofre golu dahuluk, hafoin jogador Charoenrattanapirom, susesu fura rede Timor Leste ne'ebé mak hein husi Junildo Pereira hodi muda score ba 0 - 1.

Golu refere akontese bainhira Tailandia lansa atake husi sorin karuk husi area defeza ekipa Lafaek nian, hodi N. Weerawatnodom kruja bola ba sorin loos ne’ebé Charoenrattanapirom kontrola ho diak, lansa suta ba sorin karuk ne’ebé guarda rede lakonsege baku sai.

Ho score refere ekipa rua kontinua lansa kontra ataka ba malu maibé Ekipa Elefante Mutin ne'ebé domina liu bola marka tan golu ida hodi haboot liu tan score ba 2-0 liu husi jogador Sarachat iha minutu 81. N. Weerawatnodom ne’ebé lori bola tama husi sorin karuk konsege kruza ba area-16 ne’ebé S. Sarachart simu suta direita ba baliza.

Ho lakon golu rua, ekipa Lafaek tenta halo atake hodi lansa suta dala-3, no dala-2 mak kona tarjetu. Nune’e to jogu termina score 0 – 2.

Tuir estatistika ne’ebé JHD asesu iha goal.com katak Tailandia domina bola ho pursentu 75 no Timor – Leste 25, iha ne’ebé Tailandia lansa suta dala-24 no Timor – Leste 3. Enkuantu tuir istoria heat to heat entre ekipa rua, Timor – Leste lakon ona dala-1 iha AFF SUZUKI CUP 2018 ho score 0 – 7.

Ho vitória ne'e lori ekipa Elefante Mutin ukun provizoriu iha tabela klasifikasaun SUZUKI CUP pool (A) tinan 2020. Ho pontus 3 husi joga dala-1. Enkuantu Selesaun Nasionál Timor Leste ne'ebé mak simu derota tuur iha opizisaun ikus liu ho pontus 0 husi joga dala-1 no sofre golu rua.

---

Timor Leste: Fábio Marciel da Silva ; Junildo Pereira, A. De. Almeida, Filomeno, N. Sarmento, Jonh Frith, Cristovao, Y. K. Paulos, Paulo Freitas, Rufino Gama, Mouzinho de Lima.

Tailandia: A Polking ; C. Budprom, T. Do, K. Kaman, M. Bihr, N. Weerawa, S. Yooyen, P. Sukjitthammak, T. Puangchan, B. Phala, T. Dangda, S. Sarachat.

---