Timor Leste Derota ho Myanmar 2-0

Dili - Ekipa Selesaun Nasionál Timor Leste Derota kontra Myanmar ho score 2-0 iha jogu kontinusaun AFF SUZUKI CUP 2020 pool (A)

Duelo entre Timor Leste kontra Myanmar ne'e hala'o iha Nasionál Stadiu Singapure kuarta (08/12/2021).

Iha inisiu jogu inisiu jogu Selesaun Nasionál Timor Leste ne'ebé mak tun ho formatu (4-2-3-1) ho Myanmar ne'ebé mak koñesidu ho naran Leao ne'e tun ho formatu (4-1-4-1) ne'e hotu hotu hatudu jogu furak iha kampu.

No tama ba iha minutu 14 sorti di'ak monu ba Leao hodi lidera ho score 1-0 liu husi jogador P. Than. Golu refere akontese bainhira jogador Timor Leste hasai bola sala ba fali P. Than, nune'e simu kedan ho kabesa ba tian parte los nian.

Tama ba iha minutu 39 sorti aat akontese ba Selesaun Nasionál Timor Leste, hafoin Avansadu prinsipál Joao Pedro hetan aleiza ho nune'e tenke troka ho Elias Mesquita.

Maske ekipa rua ne'e nafatin lansa kontra no ataka ba malu maibé la iha tan golu ruma mak akontese to'o termina jogu primeira parte score mantein 1-0.

Kontinua ba jogu segunda parte ekipa rua mantein nafatin kontra ataka ba malu maibé tama ba iha minutu 50 ekipa Lafaek tenke sofre tan golu ida hafoin M. Maung simu bola husi H. Aung iha linha 16 hodi suta ba sorin tian karuk, score ba 2-0.

Hela ho score 2-0 ekipa lafaek tenta nafatin hodi responde golu liu husi jogador Paulo Freitas no Elias Mesquita no mós Rofino maibé esforsu ne'ebé mak ekipa Selesaun Nasionál Timor Leste halo la fó rezultadu pozetivu ho nune'e to'o termina jogu segunda parte score nafatin 2-0 vitória ba ekipa Leao.

Husi rezultadu derota ne'e hanehan Selesaun Nasionál Timor Leste ba iha okos liu ho pontus 0 husi joga dala-2 lakon hotu.

Enteretantu Timor Leste sei iha jogu rua kontra Filipina no uma na'in Singapure.